توز باسیب اوز گوزون سیلنین یوخدی
موسی احمدی مرند
“آی قوجا مرند”
شعر “آی قوجا مرند”
توز باسیب اوز گوزون سیلنین یوخدی
هامیلار اغلاییر گولنین یوخدی
دوشموسن چوخورا بیلنین یوخدی
احوالان یانیرام آی قوجا #مرند
داغیلدی باغلارین پوزولدو باغچان
ییخیلدی ایوانین سوکولدو تاغچان
ساتیلدی آلتینین قاچیلدی آغچان
احوالان یانیرام آی قوجا #مرند
چوخدور وای وای دیینیانان یوخ حالان
میدانین قازدیلار توکولدو قالان
#هرزنه_سو_چکماق_یالاندیر_یالان؟!
احوالان یانیرام آی قوجا #مرند
کهریزلرین قیرخ ایاقلار باتدیلار
آغ تورپاغین اوجوز پولا ساتدیلار
جولان وئریر گورمه میشلر آتدیلار
احوالان یانیرام آی قوجا #مرند
هر کوچه ده سرین سولار چیخاردی
چوخ زور گلیب وریانلاری ییخاردی
خانیملاردا پالتار یووب سیخاردی
احوالان یانیرام آی قوجا #مرند
چشمه لرده توخاش سسی باتیبدیر
مردی دع وار دولتین ساتیبدیر
باغبانلاردا یوخلویوبدور یاتیبدیر
احوالان یانیرام آی قوجا #مرند
یادیمدا آتامین پاپروز ائشمه سی
گونه ور اونونده چوپوق دئشمه سی
نه اولدو او گوزل بولاق چشمه سی
احوالان یانیرام آی قوجا #مرند
آرخلاریندان دورو سولار گئچردی
چشمه لرده یار یارینی سئچردی
بیرچاناقدا سرین سودان ایچردی
احوالان یانیرام آی قوجا #مرند
بی گوزو مرندین گوزویدو اوندا
مجلسلر نوغولوسوزویدو اوندا
مرد ده مرندین اوزویدو اوندا
احوالان یانیرام آی قوجا #مرند
تاریخلرده آدین سانین وار سنین
داماریندا قیزیل قانین وار سنین
کائولان تک بیاض کانین وار سنین
احوالان یانیرام آی قوجا #مرند
چوخ حورمتلی ارنلرین واریدی
قیزیل گولی درنلرین واریدی
داملار اوسته سرنلرین واریدی
احوالان یانیرام آی قوجا #مرند
تورپاق آلتدا کیشی لرین یاتیبلار
اوز شهرین عزیزلرین آتیبلار
قالانلاردا غم گولونده باتیبلار
احوالان یانیرام آی قوجا #مرند
👈#دردینی_قانیرام_آی_قوجا_مرند
شاعر:موسی احمدی مرند
دکلماتور: حمیده امیدخواه
میکس و مسترینگ:اکبر ترکان
برچسب ها :
ناموجود- نظرات ارسال شده توسط شما، پس از تایید توسط مدیران سایت منتشر خواهد شد.
- نظراتی که حاوی تهمت یا افترا باشد منتشر نخواهد شد.
- نظراتی که به غیر از زبان فارسی یا غیر مرتبط با خبر باشد منتشر نخواهد شد.
ارسال نظر شما
مجموع نظرات : 0 در انتظار بررسی : 0 انتشار یافته : ۰